Slippurinn Akureyri ehf.

Breytingum á K. Arctander er lokið og heppnaðist verkið mjög vel.  Skipt var um allan frystibúnað í skipinu, bæði frysta og vélbúnað.  Einnig var skipið málað og ýmis slippverkefni unnin samhliða vinnunni við frystibúnaðinn.  Myndirnar af breyttum K. Arctander tók Þorgeir Baldursson.

Slippurinn Akureyri ehf. hefur lokið við að breyta Poseidon EA 303 í rannsóknarskip.  Skipið mun sigla í kvöld klukkan 22:00 frá Akureyri áleiðis til Kanada, þar sem sett verða í hann botnrannsóknartæki.  Eftir það mun skipið halda til rannsókna á hafsbotninum á milli Kanada og Grænlands.

Við óskum eigendum og áhöfn til hamingju með skipið og óskum þeim velfarnaðar í starfi. 

Það er mikið líf í Slippnum þessa daganna.  Verið er að leggja lokahönd á Hoffellið og Hákon, en þau hafa verið í almennum slipp síðustu daganna.  Fyrir helgi var síðan Sigurbjörgin frá Ólafsfirði tekin upp og verður skipið málað ásamt því að sinnt verður almennum slippverkefnum.  Einnig sér fyrir lokin á breytingunum á Poseidon í rannsóknarskip úr skuttogara.  Þá kom í slipp í morgun togarinn K. Arctander frá Lofoten í Noregi.  En skipt verður um allan frystibúnað í skipinu, bæði frysta og vélbúnað.       

Fjallað er um breytingarnar í Barða NK-120 sem unnar voru í Slippnum Akureyri ehf í nýjasta tölublaði Fishing News International. 

Umgjöllunin er mjög ítarleg og tekur heila opnu.  Verður þetta að teljast mjög jákvæð umfjöllun fyrir alla þá aðila sem að verkinu komu.

Slippurinn Akureyri ehf.  í samstarfi við Kælismiðjuna Frost ehf. hafa gert samning um talsvert miklar endurbætur á togaranum K. Arctander frá Lofoten í Noregi.  Skipið er í eigu Norland Havfiske A/S sem er hluti af Aker Seafoods ASA samsteypunni, sem auk þess að hafa aðalstöðvar sínar í Osló og gera út frá Noregi er einnig með starfsemi í Danmörku, Bretlandi, Frakklandi og Spáni.

Helstu verkefnin verða að skipta um allan frystibúnað í skipinu, bæði vélbúnað og frysta.