Naustatangi 2 (+354) 460 2900 info@slipp.is

Kaldbakur EA 1 fer vel af stað með nýtt vinnsludekk

Kaldbakur EA fór í sína fyrstu veiðiferð snemma í september mánuði að aflokinni uppsetningu á nýjum og fullkomnum vinnslubúnaði frá Slippnum Akureyri. 
Búnaðurinn í vinnslunni hefur reynst vel að sögn Angantýs Arnars, annars tveggja skipstjóra á Kaldbaki EA.

“Við erum mjög ánægðir með nýja vinnsludekkið, gæði aflans eru mikil og vinnslan gengur hratt og örugglega fyrir sig. Sniglakörin koma vel út, bæði hvað varðar blóðgun og kælingu og engir hnökrar hafa verið á lestarkerfinu, það er mikill munur að geta karað fiskinn upp á vinnsludekkinu.
Þau litlu vandamál sem hafa komið upp höfum við leyst í sameiningu með Slippnum og hefur eftirfylgni þeirra með búnaðinum verið til fyrirmyndar” segir Angantýr Arnar.

Ólafur Ormsson sviðsstjóri hjá Slippnum segir það afar ánægjulegt að Kalbakur fari vel af stað.

“Við hönnun á vinnsludekkinu var lögð áhersla á að gera alla vinnsluna um borð hagkvæma, auðvelda í þrifum og þannig tryggja framúrskarandi aflameðferð.
Áreiðanleiki alls búnaðarins skiptir einnig gríðarlegu máli og er vandlega gætt að honum. Samstarfið með Samherja í þessu verkefni hefur gengið mjög vel og er ánægjulegt að sjá hversu vel vinnsludekkið hefur verið að reynast ” segir Ólafur.

 

Uppsetning á vinnslubúnaði í Kaldbak EA 1 gengur vel

Uppsetning á vinnslubúnaði í ísfisktogarann Kaldbak er í fullum gangi hjá Slippnum Akureyri og gengur vel. Stór hluti af búnaðinum er kominn um borð í skipið og er verið að stilla hann af og setja upp hluta af tölvustýringu fyrir vinnsludekkið. Hjörvar Kristjánsson, verkefnnastjóri nýsmíða hjá Samherja, segir að það ríki mikil eftirvænting fyrir nýja vinnsludekkinu.

„Við erum mjög spennt fyrir vinnsludekkinu í Kaldbak. Það var lögð mikil áhersla á öfluga blæðingu, þvott og góða kælingu á fisknum og við erum fullviss að gæði afurða úr Kaldbak verði framúrskarandi”.

Áætlað er að uppsetning á vinnsludekki Kaldbaks verði lokið fyrir upphaf nýs fiskveiðiárs og að skipið haldi til veiða strax í kjölfarið.

Slippurinn Akureyri útskrifar 15 nemendur úr Iðnir

Föstudaginn 24. maí útskrifaði Slippurinn á Akureyri 15 nemendur úr valáfanganum Iðnir fyrir alla sem unnin er í samstarfi við grunnskóla Akureyrar. Um er að ræða valáfanga fyrir nemendur í 9. og 10. bekk sem ætlað er að vekja áhuga grunnskólanemenda á iðngreinum og kynna fyrir þeim þau fjölbreyttu störf og starfstækifæri sem iðngreinar hafa upp á að bjóða. Námið er fjölbreytt og byggir á fræðslu, vettvangsferðum og verklegum æfingum og fer námskeiðið að mestu leyti fram í Slippnum á Akureyri. Starfsfólk Slippsins og umsjónaraðilar frá grunnskólum Akureyrar halda utan um áfangann og fá nemendur að kynna sér helstu starfsemi Slippsins, t.d. vélvirkjun, stálsmíði, ryðfría smíði, tölvuteikningu, rafeindatækni og fleira.


„Slippurinn er gríðarlega stoltur að geta boðið upp á svona áhugaverðan valáfanga fyrir grunnskólanemendur í 9 og 10 bekk hér á Akureyri. Við fórum af stað með þetta verkefni í fyrra og það hefur gengið ótrúlega vel, á þessu ári þá fórum við einnig í heimsóknir í Verkmenntaskólann á Akureyri og Rafeyri sem var mjög skemmtilegt og fræðandi fyrir nemendur. Alls eru þetta 15 skipti á vorönn sem nemendur mæta í og skila af sér video-dagbók eftir hvern tíma. Mikil ásókn er í þennan valáfanga og því miður þá komast færri að en vilja” Segir Kristján Heiðar Kristjánsson, Mannauðsstjóri Slippsins Akureyri ehf.

Nemendur kynna lokaverkefnin sín

Nýtt mötuneyti tekið í notkun

Sylvía Benediktsdóttir og Viktoryia Matusevich standa vaktina í nýju mötuneyti Slippsins á Akureyri.
Sylvía Benediktsdóttir og Viktoryia Matusevich standa vaktina í nýju mötuneyti Slippsins á Akureyri.

Nýtt mötuneyti var tekið í notkun hjá Slippnum á Akureyri fyrr í þessum mánuði. Framkvæmdin fólst í endurbótum á matsal þar sem m.a. sett var nýtt kerfisloft til að bæta hljóðvist og fyrirkomulagi á matsalnum var breytt. Ennfremur voru öll eldhústæki endurnýjuð ásamt öllum borðbúnaði, borðum og stólum. Nýtt skráningarkerfi var einnig tekið í notkun þar sem starfsmenn Slippsins nota starfsmannakortin sín til að greiða fyrir matinn í stað matarmiða.
„Matsmiðjan, áður Lostæti, hafði þjónustað okkur með mötuneyti hér til fjölda ára og gert vel. Við hinsvegar tókum þá ákvörðun að segja skilið við Matsmiðjuna og gera tilraun með að Slippurinn myndi reka sitt eigið mötuneyti því það skiptir gríðarlega miklu máli að geta boðið starfsfólki upp á góða aðstöðu og góðan mat á viðráðanlegu verði. Framkvæmdin tók rúma þrjá mánuði og er útkoman frábær. Kortakerfið er enn í þróun og verður orðið fullklárt eftir örfáar vikur. Þá eru starfsmenn einnig farnir að forskrá sig í mat en það er afar mikilvægur þáttur í því að halda kostnaði niðri og minnka matarsóun“
segir Kristján Heiðar mannauðsstjóri hjá Slippnum Akureyri í viðtali við heimasíðuna.

Slippurinn réð Sylvíu Benediktsdóttur sem matráð en hún þekkir vel kröfurnar okkar þar sem hún var matráður Matsmiðjunnar í Slippnum og samhliða henni mun Viktoryia Matusevich starfa í nýja mötuneyti Slippsins.